ޅ.ނައިފަރު ޖުވެނައިލްއިން އެރަށުގައި ކުރިއަށް ގެންދިޔަ ‘ޅ.ޓަރޓަލް ފެސްޓިވަލް’ ގައި ހިމަނައިގެން ސްކޫލްތަކުގެ މެދުގައި ކުރިއަށްގެންދިޔަ ވެލާ, ކަހނަބު ތައްޔާރުކުރުމުގެ މުބާރާތުން އެއްވަނަ ހޯދީ ޅ.އަތޮޅު މަދަރުސާ އެވެ.
ފެސްޓިވަލްގައި ބައިވެރިވި ސްކޫލްތަކުގެ މެދުގައި ކުރިއަށްގެންދިޔަ މުބާރާތުގައި 13 ސްކޫލުން ވާދަކުރިއެވެ. މުބާރާތުން 2 ވަނަ ހޯދީ ބ.އަތޮޅު މަދަރުސާ އެވެ. ތިންވަނަ ހޯދީ އއ.ހިމަންދޫ ސްކޫލެވެ.
މުބާރާތުގައި ޓަރޓަލް ތައްޔާރުކުރަން ދިނީ 45 މިނިޓެވެ. ނައިފަރު ޓަރޓަލް ބީޗްގައި ކުރިއަށް ގެންދިޔަ މުބާރާތުގައި ވެލާ, ކަހނަބު ތައްޔާރުކުރީ ވެލިންނެވެ. މީގެއިތުރުން ބޭނުންކުރީ އެތަނުން ލިބެން ހުރި ތަކެއްޗާއި ވަސީލަތެވެ. މޫދު ލޮނާއި, އެސަރަހައްދުގައި ހުރި ގަސްތަކުން ފައިބާފައިހުރި ފަތެވެ. އަދި ކަޅު ފަސް ކޮންމްވެސް ވަރަކަށް ބޭނުން ކުރިއެވެ. ފެސްޓިވަލްގެ ހަރަކާތްތަކުގެ ތެރެއިން އެންމެ ބޮޑު ސަމާލުކަމެއް ލިބުނު މުބާރާތަކީވެސް މިއީއެވެ.
މީގެއިތުރުންވެސް ސްކޫލްތަކުގެ މެދުގައި އިތުރު މުބާރާތްތައް ކުރިއަށް ގެންދިޔައެވެ. ފެސްޓިވަލްގައި ކޮންމެ ސްކޫލަކުންވެސް ވަނީ ސްޓޯލެއް ތައްޔާރުކޮށްފައެވެ. ސްޓޯލް ޑިޒައިން ކުރުމުން އެއްވަނަ ހޯދީވެސް ކުރެންދޫގައި ހުންނަ ޅ.އަތޮޅު މަދަރުސާއެވެ. ދެވަނަ ހޯދީ ހިންނަވަރުގައި ހުންނަ ޅ.އަތޮޅު ތައުލީމީ މަރުކަޒެވެ. އަދި ތިންވަނަ ހޯދީ ހޮޅުދޫ މޭނާ ސްކޫލެވެ. ޅ.އަތޮޅު ސްކޫލުން ވަނީ ސަގާފީ ޑާންސް ހުށަހަޅައިގެންވެސް އެއްވަނަ ހޯދާފައެވެ.
އުކާލެވޭ ކުނިން ތަކެތި ތައްޔާރުކުރުމުންވެސް އެއްވަނަ ހޯދީ ޅ.އަތޮޅު މަދަރުސާ އެވެ. މިބައިން ދެވަނަ ހޯދީ އޭދަފުށީގައި ހުންނަ ބ.އަތޮޅު ތައުލީމީ މަރުކަޒެވެ. ތިންވަނަ ހޯދީ ހުޅުދުއްފާރު ސްކޫލެވެ.
އުކާލާފައިހުރި ޕްލާސްޓިކް ފުޅި ހޮވާ, އެއްކުރުމުގެ މުބާރާތުން އެއްވަނަ ހޯދީ ނ.ކުޑަފަރީ ސްކޫލެވެ. ދެވަނަ ހޯދީ ރ.ހުޅުދުއްފާރު ސްކޫލެވެ. ތިންވަނަ ހޯދީ ކުޅުދުއްފުށި އަފީފުއްދީން ސްކޫލެވެ.
ޓަރޓަލް ފެސްޓިވަލް ވަރަށް ބޮޑަށް ސްކޫލްތަކަށް ވަނީ އަމާޒުކޮށްފައެވެ. މިއީ މިފެސްޓިވަލް ބޭއްވި 8 ވަނަ ފަހަރެވެ. ފުރަތަމަ އަހަރު ބައިވެރިވީ 3 ސްކޫލެވެ. މިފަހަރު 14 ސްކޫލް ރަޖިސްޓްރީވެ, 13 ސްކޫލުން ބައިވެރިވިއެވެ.
ހަބަރުގައި ޅ.އަތޮޅު މަދަރުސާގެ ދަރިވަރުންގެ ފޮޓޮއެއް ހިމެނިފައި ނެތީމަ އެހާ ފުރިހަމައެއް ނޫން.
ގުއިތަފާލުގަ ދަނޑިތެޅުމުގެ މުބާރާތެއް ބާއްވާފަ ހަމަ ތިގޮތަށް ކިއިދާނެ