މިދިޔަ ޖުލައި 22 ވަނަ ދުވަހު ދައުރުވި އެންމެ ސަމާލުކަން ބޮޑުވި އެއް ޚަބަރަކީ ވ.އަތޮޅުގެ ރަމްޒު ‘ވާވުޝިޕްރެކް’ އޮޔާ ދާ ވާހަކައެވެ. އެކަން ސަމާލުކަމަށް ގެނައީ އެމްއެންޑީއެފް އިންނެވެ. އެޚަބަރަކީ ވަރަށްގިނަ ބައެއްގެ ސަމާލުކަން ހުއްޓުނު ކަންބޮޑުވުން ބޮޑު ޚަބަރެކެވެ.
ސީދާ ޝިޕްރެކް ކައިރި ސްނޯކުލް ކުރަން މިއަތޮޅަށް އަންނަ އެތައް ދިވެހިންނެނެވެ. މާލެ އަތޮޅާއި, އަރި އަތޮޅާއި ވ.އަތޮޅަށް އަންނަ ފަތުރުވެރިންގެވެސް ވަރަށް މަގުބޫލް ޕޮއިންޓަކީ ޝިޕްރެކްއެވެ. މާފުށިންވެސް ބޮޑަތި ލޯންޗް ތަކުގައި ދަތުރު ހަދާފައި އާދެއެވެ. ވ.އަތޮޅުގެ ގެސްޓް ހައުސްތަކުން ހަފްތާއަކު މަދުވެގެން އެއް ދުވަހު ފަތުރުވެރިން ގޮވައިގެން ޝިޕްރެކަށް ދަތުރު ހަދައެވެ.
އެކަމަކު ޝިޕްރެކް އޮޔާދާ ވާހަކައާއެކު މިހާރު ޝިޕްރެކް ކޮބައިތޯ ސުވާލުކުރާ މީހުންވެސް މަދެއް ނޫނެވެ. ޝިޕްރެކް އަދިވެސް އެބައޮތެވެ. އެކަމަކު ކުރިން އޮތް ތަނުގައި ކުރިން އޮތްވަރަކަށް ނޫނެވެ. މިހާތު ޝިޕްރެކް އޮތީ އަތޮޅުވެރިކަން ކުރާ ފެލިދޫ ބަނދަރަށް ނިކުމެ ބަލާލާއިރު ފެންނަ ހިސާބުގައެވެ. މިނިޓަކުން ދެވޭ ހިސާބުގައެވެ. އޮތީ މަތީބައި އެކަންޏެވެ. ވަރަށްބޮޑަށް ހަލާކުވެފައެވެ. ބައިސްކަލެއްވެސް ނެތެވެ.
އެހެންނަމަވެސް މިހާރުވެސް ޝިޕްރެކަށް އޮތް ޑިމާންޑަށް ބަދަލެއް ނާދެއެވެ. ކޮންމެ ދުވަހަކު އެތައް ބަޔަކު އާދެއެވެ. ސްނޯކުލްކޮށް ވަގުތު ހޭދަކުރެއެވެ. ފަތުރުވެރިންނާއި ދިވެހިންނެވެ. ވ.އަތޮޅާއި މާލެ އަތޮޅުންވެސް މެއެވެ. އޮޔާދަނިކޮށް މިހާރު އޮތްތަނަށް ޝިޕްރެކް ފެއްތީ ތިނަދޫ އީކޯބޫ ގެސްޓްހައުސްގެ ފަރާތުން އިސްނަގައިގެންނެވެ. ތިނަދޫއާ ޝިޕްރެކްއާވެސް ދުރެއް ނޫނެވެ.
ޝިޕްރެކް ކުރިން އޮތީ ފެލިދޫއަށް ވުރެ ކުޑަތަންކޮޅެއް ކެޔޮދޫއާ ކައިރީގައެވެ. އެސަރަހައްދުގައި މިހާރުވެސް ޝިޕްރެކްގެ އަޑީގެ ބައެއް ބައިތައް ވާނެކަމަށް އެތަނަށް ގޮސްއުޅޭ މީހުން ބުނެއެވެ.
ޝިޕްރެކް ނެތި ދިއުމަކީ ވ.އަތޮޅުން ބައެއް ދިއުންފަދަ ކަމެކެވެ. އެކަމަކު ޝިޕްރެކް އަދި މުޅިން ނެތި ނުދެއެވެ.
ޝިޕްރެކަށް ދާން ޕްލޭން ހަދާފައިވާ މީހުން އަވަސްކުރާށެވެ. ޝިޕްރެކާއި ވާވު އަތޮޅު ވަނީ ގުޅިލާމެހިފައެވެ. ވާވު އަތޮޅާއެކު ޝިޕްރެކް ސިކުނޑިއަށް އަންނަނީ ސަބަބެއް އޮވެގެންނެވެ.
2029 ragalhu kolla dhevvaa