ތިލައުތުރު ފުޓްސަލް މުބާރާތުގެ ގްރޫޕް ސްޓޭޖްގެ މެޗުތައް ނިމި, ސެމީފައިނަލްގެ ޖާގަތައް ޔަގީންވެއްޖެއެވެ. މުބާރާތުގެ ސެމީފައިނަލުން ޖާގަ ހޯދީ ދިއްދޫ އާއި މުރައިދޫގެ އިތުރުން އިހަވަންދޫ އާއި އުތީމެވެ.
މުބާރާތުގެ ސެމީފައިނަލްގައި އެންމެ ފަހުގެ ޗެމްޕިއަން އިހަވަންދޫ ވާދަކުރާނީ މުރައިދޫ އާއެވެ. މިދިޔަ އަހަރުގެ ރަނަރަޕް އުތީމް ވާދަކުރާނީ ދިއްދޫއާއެވެ. ސެމީފައިނަލްގެ ފަހު ޖާގަ އުތީމް ހޯދީ ގްރޫޕް ސްޓޭޖް ފަހު މެޗުގައި ވަރަށް ވާދަވެރި ކުޅުމަކަށްފަހު 3-2 ން ފިއްލަދޫ ބަލިކޮށްގެންނެވެ. މެޗަށް ނިކުއިންއިރު މިދެޓީމަށްވެސް ސެމީގެ ފުރުޞަތު އޮތީ މޮޅުވެގެންނެވެ. މެޗު އެއްވަރުވެއްޖެ ނަމަ ސެމީއަށް ދާން އޮތީ ވަށަފަރެވެ.
ފިއްލަދޫއާ ދެކޮޅަށް ކުޅުނު ވާދަވެރި މެޗުގެ ފުރަތަމަ ލަނޑު ޖަހާ އުތީމަށް ކުރިހޯދައިދިނީ މުޙައްމަދު ރިޝްމީ އެވެ. އެކަމަކު ފިއްލަދޫގެ އަލީ އަފްރާހު ލަނޑު ޖަހާ ނަތީޖާ ހަމަހަމަކޮށްދިނެވެ. އަދި އާދަމް އަބްދުއްރަހީމް ލަނޑު ޖަހާ ފިއްލަދޫއަށް ކުރި ހޯދައިދިނެވެ. އެކަމަކު އެލީޑްގައި މިނިޓެއްވެސް ދެމި ނޯވެވުނެވެ. އުތީމުން ނަތީޖާ ހަމަހަމަ ކުރީ މުޙައްމަދު މަޒީންގެ ލަނޑުނެނެވެ. މިނަތީޖާގެ ސަބަބުން ވަށަފަރު އުފާވެރިކަމުގައި މެޗު ބަލަން ތިއްބާ އުތީމް ހެއްވާލީ ލިބުނު ޕެނަލްޓީ އަކުން އަހުމަދު އައިހަމްއެވެ. މެޗުގެ މޮޅު ކުޅުންތެރިއަކީވެސް އައިހަމްއެވެ. މިއީ އައިހަމް މުބާރާތުގައި ކުޅުނު ފުރަތަމަ މެޗުވެސް މެއެވެ.
މިމެޗުގެ ކުރިން ވަށަފަރުން ވަނީ 7-5 ން ހޯރަފުށި ބަލިކޮށްފައެވެ. އެކަމަކު އެމީހުންނަށް ފުރުޞަތު ގެއްލުނީ ފަހު މެޗުގައި އުތީމް މޮޅު ވުމުންނެވެ. ހޯރަފުށި ބަލިކުރަން ވަށަފަރަށް ލަނޑުތައް ޖަހައިދިނީ އަބްދުالله ސިނާން އާއި އަހުމަދު ސިނާން އާއި އިބްރާހީމް ޝަނޫން އާއި ހުސައިން ހަމީދު މޫސާއެވެ. މެޗުގެ މޮޅު ކުޅުންތެރިޔާ އަބްދުالله ސިނާން ތިން ލަނޑު ޖެހިއެވެ. އަހުމަދު ސިނާން ދެ ލަނޑު ޖެހިއެވެ. އެއީ ދެބެންނެވެ.
ހޯރަފުށީގެ ފަސް ލަނޑުގެ ތެރެއިން ތިން ލަނޑު ޖެހީ އަލީ ޒިޔާދުއެވެ. އެންމެ ފަހުން ދެ މެޗުގައިވެސް އޭނާ ވަނީ ހެޓްރިކް ހަދާފައެވެ. ހޯރަފުށްޓަށް ދެން ލަނޑު ޖަހައިދިނީ ހުސައިން ރަޝީދު އާއި ހުޝާމް ހަސަން އެވެ.
މުބާރާތުން އެންމެ ހިތްދަތިގޮތަކަށް ކެޓީ ވަށަފަރެވެ. އެމީހުން މުބާރާތުގެ ގްރޫޕް ސްޓޭޖްގައި ކުޅުނު ހަތަރު މެޗުންވެސް ބައްޔެއް ނުވެއެވެ. އުތީމާއި އިހަވަންދޫގެ އިތުރުން ދިއްދޫ ސެމީއަށް ދަތުރުކުރީވެސް ބަލިނުވެއެވެ. ސެމީފައިނަލް ދެ މެޗު ކުޅޭނީ ހޯމަ ދުވަހުއެވެ.
