ވ.އަތޮޅު ވޮލީބޯޅަ މުބާރާތުގެ ފިރިހެން ޑިވިޝަންގައި ފުލިދޫގެ މައްޗަށް ކެޔޮދޫން ކުރިހޯދާ ފުރަތަމަ މޮޅު ހޯދައިފިއެވެ.
ފުރަތަމަ މެޗުން ބަލިވެފައި އޮތް ދެޓީމްގެ މެޗު ކެޔޮދޫން ކާމިޔާބުކުރީ ސީދާ ތިން ސެޓުންނެވެ. އަހުމަދު އަބްދުލްކަރީމް (ލޯންގޭ) އާއި އާދަމް ފައިރޫޒް ކުޅޭ ކެޔޮދޫން މެޗުގެ ސެޓްތައް ގެންދިޔައީ 25-18, 26-24 އަދި 25-17 ނެވެ. ފުލިދޫ ޓީމްގައި ގައުމީ ޓީމްގެ ކުޅުންތެރިއަކު ނުހިމެނެއެވެ. ނަމަވެސް ބިދޭސީ ދެ ކުޅުންތެރިން ފުލިދޫ ޓީމްގައިވެސް ހިމެނެއެވެ. މުބާރާތުގައި ވާދަކުރާ ކޮންމެ ޓީމެއްގައިވެސް ބިދޭސީ ދެ ކުޅުންތެރިން ކުޅެއެވެ.
މެޗަށްފަހު ކެޔޮދޫގެ އަހުމަދު ފާޒިލް ބުނީ މެޗުން މޮޅުވިޔަސް އެންމެ ހިތްހަމަ ޖެހޭވަރަށް ނުކުޅެވޭ ކަމަށެވެ. މިސްޓޭކްތައް ފެނުން ކަމަށާއި, ކުރިއަށް އޮތް މެޗަށް ނިކުންނާނީ އެމިސްޓޭކްތައް ރަނގަޅު ކޮށްގެން ކަމަށް ކުރިން ގައުމީ ޓީމަށްވެސް ކުޅުނު ފާޒިލް ބުންޏެވެ.
ފުލިދޫގެ ކެޕްޓަން ހަސަން އާމިރު ބުނީ މަސައްކަތުގެ ރޭޓް އެންމެ ރަނގަޅީ އޭނާގެ ޓީމް ކަމަށާއި, ތަފާތަކީ ދެޓީމްގެ ކުޅުންތެރިންގެ ތަފާތު ކަމަށެވެ. ފުލިދޫން މުބާރާތުގައި ވާދަކުރަނީ މުސްތަޤްބަލަށް ވިސްނުމާއެކު ރަނގަޅު ކުޅުމެއް ދައްކަން ކަމަށެވެ.
ފުލިދޫ ކުޅުނު ފުރަތަމަ މެޗުގައި ބަލިވީ ތިނަދޫ އަތުންނެވެ. ކެޔޮދޫ ފުރަތަމަ މެޗުގައި ފެލިދޫ އަތުން ބަލިވީ ވާދަވެރި ކުޅުމަކަށްފަހު 3-2 ސެޓުންނެވެ. ދެ މެޗުންވެސް މޮޅުވެ އެއްވަނައިގައި އޮތީ ފެލިދޫ އެވެ.
މުބާރާތުގައި ކެޔޮދޫ ވާދަކުރަނީ ޖުނައިދު އަބްދުالله ގެ އިރުޝާދުގެ ދަށުންނެވެ. ފުލިދޫގެ ކޯޗަކީ އަހުމަދު އަދީލް (ބޭބެ) އެވެ.
