މިރަށަށް ފައިބާއިރުވެސް ޢާއްމު ރަށަކާ ތަފާތެވެ. ފައިބަން އޮތީ ޖެޓީއެކެވެ. ޖެޓީން ފައިބައިގެން ރަށުގެ މައިގަމުން ކުރިއަށް ދިޔަވަރަކަށް އިހުސާސް ކުރެވޭނީ އަމާން ކަމެވެ. ރައްކާތެރިކަމެވެ. ހަމަހިމޭން ކަމެވެ. މިއީ ފަޅު ރަށެއް ނޫނެވެ. އެކަމަކު 500 ގެ ޖުމްލަ އާބާދީއެކެވެ. އެއާބާދީ އަށްވުރެ ރަށުގައި ދިރިއުޅޭ އަދަދު މަދުވާނެއެވެ. އަދި މިއީ ހަމަ ޢާއްމު ރަށެކެވެ.
ދެން އޮތީ މިރަށުގެ އެންމެ ޚާއްޞަ ސަރަހައްދެވެ. ރަށުގެ މީހުން ދިރިއުޅޭ ސަރަހައްދާ ވަކިން ޖެޓީ އޮތް ފަރާތް ނޫން އަނެއް ފަޅިއެވެ. އެމަގުން ކުރިއަށް ދިޔަވަރަކަށް ފެންނާނީ ތަފާތު ވައްތަރުގެ ގަސްތަކެވެ. ގަސްތައް ގިނައެވެ. ފަސްބޯ އެމަގުން ކުރިއަށްދާއިރު ހުރީ ސާއްބަ މޯލްޑިވްސްގެ ގެސްޓްހައުސް ތަކެވެ. ސާއްބަ ގާޑަން ވިއުއެވެ. ސާއްބަ ބީޗް ސުއިޓްސް އާއި ސާއްބަ ބީޗް ވިލާ އެންޑް ސްޕާ އެވެ. ދެ އަހަރެއްގެ މަތީން މިތަންތަން ތަޖުރިބާ ކޮށްފީމެވެ.
ރިސޯރޓެކޭ ހަމަ އެއްވެސް ތަފާތެއް ނެތެވެ. ރިސޯރޓެއްގެ ރޫމެއްގައި ހުންނާނެ ހުރިހާ ވަސީލަތެއް ހިމެނެއެވެ. ގަސްތައް ގިނަވުމުން ހަގީގަތުގައިވެސް އިހުސާސް ކުރެވެނީ ރިސޯރޓެއް ކަމެވެ. މީހުން ދިރިއުޅޭ ރަށެއް ނަމަވެސް ރަށު ރައްޔިތުން އައިސް އުޅޭ ހިސާބެއް ނޫނެވެ. ބީޗް ވިލާ ތަކުން ނިކުމެވެނީ ސީދާ ބީޗަށެވެ. ރާޅު ޖަހާ އަޑު ރީތިކޮށް އިވެއެވެ. މަންޒަރު ސާފެވެ. ގާޑެން ވިލާގެ ކޮޓަރިތައްވެސް އެހާމެ ހިތްގައިމެވެ. މީގެއިތުރުން ޢާއްމު ގެސްޓް ހައުސްއެއް ރަށުގެ މީހުން ދިރިއުޅޭ ސަރަހައްދުގައިވެސް ހުރެއެވެ. މިތަނުގެ ކޮޓަރިތައް ދިވެހީންނަށް ހުރީ ޚާއްޞަ އަގެއްގައެވެ. ރެއަކަށް 650-2500 ރުފިޔާއާ ދެމެދުގައެވެ.
ދެން އޮތީ ކެއިންބުއިން ކިހިނއްތޯ ކުރެވޭ ސުވާލެވެ. ރެސްޓޯރަންޓްގެ ހިތްގައިމު ކަމެވެ. ވަށައިގެން ގަހެވެ. ކޮންމެ ޓޭބަލެއްގައި އިށިއިނގެ ކޮންމެ ދިމާއަކަށް ބަލާލިނަމަވެސް ގަސްތަކެވެ. ކިތަންމެ ގިނަ ވަގުތަކު މަޑުކޮށްލަންވެސް ފޫހިކަމެއް ނެތް މާހައުލެކެވެ. ދެން އޮތީ މެނޫއެވެ. ބޭނުން ކޮންމެ އެއްޗެކެވެ. ސީފުޑް ވެސް ހިމެނޭ ގޮތަށް ތަފާތު ޑިޝް ތަކެވެ. ސޫޕްގެ އެކި ބާވަތްތަކާއި, ދިވެހި ރަހަތަކެވެ. އަގުތައް ހުރީ ދިވެހީންނަށް ޚާއްޞަ އަގުތަކެކެވެ. މިތަނުގެ ވަރަށް ޚާއްޞަ އެއްކަމެއް ފާހަގަކުރާ ނަމަ މިރެސްޓޯރަންޓް ހުޅުވީންސުރެ މިރަށުގެ ރައްޔިތުންނަށް ކޮފީ ހިލެއެވެ.
ކޮލިޓީ ސްޕާއާއި މޫދު ކުޅުވަރުގެ ވަސީލަތްތަކާއެކު މިއީ ހަމަ ރިސޯރޓެކެވެ. ރިސޯރޓްތަކުގައި އަގުބޮޑު ޗުއްޓީ ހަދާލުމަކީ ފަސޭހަކަމެއް ނޫނެވެ. ޖީބަށް މާބަރީއެވެ. އެކަމަކު އުފަން ދުވަހެއް ފާހަގަކޮށްލަން, އެނިވަރސަރީއެއް ފާހަގަކޮށްލަން, އާއިލީ ވީކެންޑަކަށް ޒިޔާރަތްކޮށްލަން މިއީ ހަމަ ހަގީގަތުގައިވެސް ރިސޯރޓެކެވެ. ދަތުރުފަތުރުގެ ފަސޭހަކަމާއެކު ޚާއްޞަކޮށް އުތުރުގެ ރަށްތަކުގެ މީހުންނަށް މިއީ ހަމަ ވަރަށް ރަނގަޅު މާހައުލެކެވެ. މިއީ ނ.ފޮއްދޫ އެވެ. ސާއްބަ މޯލްޑިވްސްގެ ގެސްޓްހައުސްތަކާއި ރެސްޓޯރަންޓެވެ. ކުރުކޮށް ބުނާނަމަ ސާއްބަ މޯލްޑިވްސްގެ ‘ރިސޯރޓް’ އެވެ.
