ރާއްޖޭގައި އެންމެ ފުޅާކޮށް, އެންމެ ބޮޑުކޮށް, އެންމެ ގިނަ މީހުން ބައިވެރިވެގެން ޢީދު ފާހަގަކުރާ ތަނަކީ ޢީދު ސަމާ, މިއައްޑޫ ސިޓީ
މަތީގައި އެވަނީ މިފަހަރުގެ ބޮޑު ޢީދަށް އައްޑޫ ސިޓީއަށް އައިސް މިސިޓީގެ މޭޔަރާ ބައްދަލުކޮށް, ޢީދު އައްޑޫ އަށް ސިޓީއަށް ޒިޔާރަތްކުރަންވީ ކީއްވެތޯ ކުރި ސުވާލަށް ދެއްވި ޖަވާބުގެ މައިގަނޑު ހުލާސާއެވެ. މަރަދޫގައި އީދު ކުޅިވަރަށް ތައްޔާރުވުމާއި ޕްރެކްޓިސް ކުރިއަށްދިޔަ ސަރަހައްދުގައި ހުންނަވާ ބައެއް ތަފްސީލްތައްވެސް ހިއްސާކުރެއްވިއެވެ. ވިދާޅުވީ އައްޑޫގަ ޢީދު މިފާހަގަކުރެވޭ ސްކޭލްގައި ރާއްޖޭގެ އެއްވެސް ތަނެއްގައި ޢީދު ފާހަގައެއް ނުކުރާނެ ކަމަށެވެ. އައްޑޫ ސިޓީގެ ހުރިހާ އަވަށްތަކުގައި, ހުރިހާ ރަށްތަކުގައިވެސް އެއް ފެންވަރެއްގައި އީދުފާހަގަކުރާނެކަން ފާހަގަކުރައްވާ އިޝާރާތް ކުރެއްވީ އެމައިދާނުގައި ކުރިއަށްދިޔަ ކަންތައްތަކަށެވެ. އޭރު އެސަރަހައްދުގައި ވާދެމުމުގެ މުބާރާތުގެ ޕްރެކްޓިސް އާއި, އީދު މަޅި ލުމަށް ކުރެވޭ ތައްޔާރީ ތަކާއި, ބޮޑު ޖަމާއަތުގެ ޢީދު ނަމާދަށްވެސް ދިޔައީ ތައްޔާރުވަމުންނެވެ.
ޢީދު ކުޅިވަރު ކުޅުމުގެ ހުއްދައަށް އެދުން ހިމެނޭ ގޮތަށް, އީދު މަޅިލުންވެސް އައްޑޫ ސިޓީގެ ހުރިހާ ރަށްތަކެއްގައި ވަކިން ކުރިއަށް ގެންދެއެވެ. މިދިޔަ އަހަރާ މިއަހަރުވެސް އެކަމުގައި ތަފާތުތައް ހުންނާނެކަމުގެ ޔަގީންކަން އެކަމުގައި އިސްކޮށް ހަރަކާތްތެރިވި ފަރާތްތަކުން ދިނެވެ. އެކަމަށް އެކަނިވެސް 15 ވަރަކަށް ދުވަސް އެމީހުން ހޭދަކުރިއެވެ.
ހިތަދޫއަށް ބަލާއިރު ކުޑަކުދިންނަށް ޚާއްޞަ އާއިލީ ހަވީރަކީ އިހުގެ ދިރިއުޅުން ކުޑަކުދީންނަށް ތަސައްވަރުކޮށްދޭ ގޮތަށް ބައްޓަންކޮށްފައިވާ އާއިލީ ހަވީރެކެވެ. އައްޑޫ ސިޓީގެ ސްކެއާ ސަރަހައްދު ތައްޔާރުކުރަނީ ކަލްޗްރަލް ވިލެޖެއްގެ ގޮތުގައެވެ. އެއާއިލީ ހަވީރަކީ ރާއްޖޭގައި ބޭއްވޭނެ އެފަދަ އެންމެ ބޮޑު އާއިލީ ހަވީރު ކަމުގެ ޔަގީންކަން އެކަމުގައި އިސްކޮށް އުޅޭ ފަރާތްތަކުން ދެއެވެ. މީގެއިތުރުން ކަލްޗްރަލް ޝޯވ އާއި ސްޓޭޖް ހަރަކާތްތަކަށްވެސް ހިތަދޫ ވަނީ ތައްޔާރުވެފައެވެ.
ސްޓޭޖް ހަރަކާތްތަކަށް ބަލާއިރު އެސްޓޭޖަކީ ދިވެހި ފަންނާނުންގެ އިތުރުން ބޭރުގެ ފަންނާނުންގެ ހުނަރުވެރިކަން ފެނިގެންދާނެ ސްޓޭޖެކެވެ. ބޮޑު އީދުގެ އެންމެ ބޮޑު ސްޓޭޖް ހަރަކާތްތައްވެސް ފެންނާނީ އައްޑޫ ސިޓީންނެވެ. އެކަމަށް ސްޓޭޖަށް ބޮޑު ބަދަލެއްގެނެސް މަރާމާތުގެ ބޮޑު މަސައްކަތްތަކެއްވެސް ވަނީ ކޮށްފައެވެ.
ވާދެމުމުގެ މުބާރާތަކީ އައްޑޫ ސިޓީގެ އެންމެ ފޯރިގަދަ އެންމެ ވާދަވެރި އެއް މުބާރާތެވެ. އެކި ރަށްތަކުން ދެޖިންސްގެ ޓީމްތައް ވާދަކުރާ މުބާރާތަށް މާކުރިން ޓީމްތައް ފޯރީގައި ކުރާ ޕްރެކްޓިސް ހެއްކަކަށް ފުދެއެވެ.
މީގެއިތުރުން ހުޅުމީދޫވެސް ހިމެނޭ ގޮތަށް އައްޑޫ ސިޓީގެ އެހެން ބައެއް ހަރަކާތްތަކަށް ބަލާއިރު ‘އީދި ގަލާ ޓްރެޝަރ ހަންޓް’ އާއި ‘ތޮށަލިގަނޑު ކޮބާ! ގެނަމުގައި ބާއްވާ ހަރަކާތާއި, ‘ޕެޕް ރެލީ’ އާއި ‘ބީޗް ފަން’ ހަރަކާތްތަކާއި ‘މާލި ޕެރޭޑް’ އަކީ ވެސް ޝައުގުވެރި ހަރަކާތަކަށް ވާނެއެވެ. ކެއްކުމުގެ މުބާރާތާއި, މަސް ރޭހާއި, ސަގާފީ ޕެރޭޑާއި, ޑްރެސް ޕެރޭޑާއި, ދުންމާރި ޝޯވެސް އޮތީއެވެ.
މުޅި އައްޑޫ ސިޓީ މިހާރު އޮތީ ބޮޑު އީދަށް ތައްޔާރުވެފައެވެ. ޔަގީންކުރެވޭ ކަމަކީ އެންމެ ގިނަ މީހުން ބައިވެރިވާ, އެންމެ ފޯރިގަދަ އީދު ހަރަކާތްތަކެއް ފެންނާނީ މިސިޓީން ކަމެވެ. އައްޑޫ ސިޓީ ރައްޔިތުން ބުނަނީ ” ހުށިހެއި ގޮތަކަށަސް އައްޑޫ ސިޓީއެ ޢީދި ކުރިއަށް އެނީ ހަމަ ހައި ކޮލިޓީކޮށް” ކަމަށެވެ. އެހެންވީމައި މިފަހަރު ‘އައްޑޫ ޢީދި ސަމާ” އެވެ.
