މިއީ މިރަށުގެ ޒަމާންވީ އާދައެކެވެ. ބައްދަލުވި ރަށުގެ އެންމެ ދުވަސްވީ މީހުންވެސް ބުނަނީ އެމީހުންގެ ދުރު ހަނދާނަކީވެސް މިއީ ކަމަށެވެ. މިއީ ކޮންމެ ރޯދަމަހެއްގެ, މކޮންމެ ހުކުރު ދުވަހެއް ފިރިހެނުންނަށް ޚާއްޞަ ފިރިހެނުންގެ ރޯދަ ވީއްލުމެވެ. ގެއިން ބޭރުގެ ހިތްފަސޭހަ ސަރަހައްދެއްގައި މިސަގާފަތް ދިރުވަމުން ގެންދަނީ ފިރިހެނުންގެ އަތްތަކުން ތައްޔާރުކޮށް, އެމީހުންގެ ރޯދަވީއްލުމެވެ. މައިގަނޑު ކެއުމަކީ ފަރުމަހެވެ. ފަރުމަހުގެ ތަފާތު ބާވަތްތަކެވެ.
ފަރުމަހާއެކު ރޮށްޓާއި ބަތެވެ. ފަންޏާއި, މޭވާގެ ބާވަތްތަކެވެ. މައިގަނޑަކީ މިއީއެވެ. މީގެ ޚާއްޞަކަމަކީ ހުރިހާ މަސައްކަތެއްވެސް ފިރިހެނުން އަމިއްލައަށް ކޮށް އެމީހުންގެ ރޯދަވީއްލުމަކަށް މިކަން ވުމެވެ. ގުޅުން ބަދަހިކޮށްދޭ ހަވީރަކަށް ވުމެވެ. އެކަމަކު މިރަށުގައި މިކަން ކުރަނީ ދެ ޖަމްއިއްޔާ (ދެއަވަށް) ވަކިންނެވެ. ދެބައި މީހުންވެސް އެމީހުންގެ ޚާއްޞަ ސަރަހައްދުގައި ހަމަ ކޮންމެ ހުކުރެެއްގައި މިކަން ކުރެއެވެ. އެންމެ ފަހު ހުކުރުގައި އަންހެނުންނާއެކު މުޅި ރަށް ބައިވެރިވާ ކަމަށް ރަށު މީހުން މައުލޫމާތު ދިނެވެ. ވީޑިއޯ ރިޕޯރޓް ފަހުން ގެނެސްދޭނަމެވެ. މިފަހަރު ބައެއް ތަސްވީރެވެ.
