މުޙައްމަދު ފާސިރު (ފާއްޓޭ) ގެ ހަތަރު ލަނޑާއެކު, އިރުމަތި އެފްސީގެ މައްޗަށް ބޮޑު މޮޅެއް ހޯދައިގެން އޭދަފުށި ކަޕްގެ ޗެމްޕިއަންކަން ވެލާ ސްޕޯރޓްސް ކްލަބް ހޯދައިފިއެވެ. ވެލާ ސްޕޯރޓްސް ކްލަބް ޗެމްޕިއަންކަން ހޯދީ ފައިނަލްގައި 5-1 ން އިރުމަތި އެފްސީ ބަލިކޮށްގެންނެވެ.
މެޗުގައި ވެލާގެ ފުރަތަމަ ހަތަރު ލަނޑުވެސް ޖެހީ މުހައްމަދު ފާސިރުއެވެ. ފުރަތަމަ ލަނޑު ޖެހީ ފުރަތަމަ މިނިޓްގައި ލިބުނު ޕެނަލްޓީއަކުންނެވެ. އޭގެ އިރުކޮޅެއް ފަހުން ދެވަނަ ލަނޑެއް ޖެހީ ޑީއޭރިޔާ ބޭރުން ގޯލްގެ ކަނަށް ފޮނުވާލައިގެންނެވެ. ފުރަތަމަ ހާފްގެ ފަހު މިނިޓްގައި އިރުމަތި އެފްސީގެ ހަމައެކަނި ލަނޑު އޭރިޔާ ބޭރުން ގޯލްގެ މަތީ ކަނަށް ފޮނުވާލައިގެން ކާމިޔާބުކޮށްދިނީ އައްޒާމް އަބްދުالله އެވެ.
އެކަމަކު މެޗުގެ ދެވަނަ ހާފް ފެށި ގޮތަށް ވެލާ ސްޕޯރޓްސް ކްލަބުން ތިންވަނަ ލަނޑެއް ޖަހާ, އިތުރު ފުރުޞަތެއް ނުދީ ހަތަރު ވަނަ ލަނޑެއްވެސް ޖެހިއެވެ. އެ ދެލަނޑުވެސް ޖެހީ ފާއްޓޭއެވެ. ފަސްވަނަ ލަނޑު ޖެހީ އިޝާން އިބްރާހީމް (ސައްޓު) އެވެ.
ފައިނަލް މެޗުގެ މޮޅު ކުޅުންތެރިއަކީ ހަތަރު ލަނޑު ޖެހި ފާއްޓޭއެވެ. އަދި މުބާރާތުގެ އެންމެ ގިނަ ލަނޑު ޖަހައިގެން ރަންބޫޓް ހޯދީ ވެސް އޭނާއެވެ. މުބާރާތުގެ މޮޅު ކުޅުންތެރިއަކީވެސް ތިން މެޗެއްގެ ނަތީޖާ އަނބުރާލި ފާއްޓޭ އެވެ.
މުބާރާތުގެ 20 އަހަރުން ދަށުގެ އެންމެ މޮޅު ކުޅުންތެރިއަކީ ވެލާ ސްޕޯރޓްސް ކްލަބްގެ އަހުމަދު ޖައުޝަން އަބްދުالله އެވެ. އެންމެ މޮޅު ކީޕަރަކީ އިރުމަތި އެފްސީގެ އަބްދުއްސަދާދް އާދަމް އެވެ. އެންމެ މޮޅު ކޯޗަކީ ތަށި ހޯދައިދިން ކޯޗު އަހުމަދު ނިޔާޒު އެވެ. ފެއަރޕްލޭ ޓީމަކީ ހުސް ސޮންގުން އެވެ.
މުބާރާތުގެ ފައިނަލްގައި ބަލިވި އިރުމަތި އެފްސީ ވަނީ ލީގު ބުރުގައި 1-0 ން ވެލާ ބަލިކޮށްފައެވެ. އެމީހުން މުބާރާތުގައި ބަލިވީ ހަމައެކަނި ފައިނަލްގައެވެ. ވެލާ ސްޕޯރޓްސް ކްލަބް މުބާރާތުގައި ބަލިވި ހަމައެކަނި މެޗަކީ ލީގު ބުރުގައި އިރުމަތި އެފްސީ އަތުން ބަލިވި މެޗެވެ.
