ފޮއްދޫ ކައުންސިލް ފުޓްސަލް ޗެލެންޖް 2024 ގެ ސެމީފައިނަލްގެ ޖާގައެއް ލިބޭނެކަން ކުޑަކަންމަތި ސްޕޯރޓްސް ކްލަބުން ޔަގީން ކޮށްފިއެވެ. އެޓީމުން ސެމީފައިނަލްގެ ޖާގައެއް ޔަގީން ކުރީ ކުޅުނު ތިން މެޗުވެސް ކާމިޔާބުކޮށްގެންނެވެ.
ތިންވަނަ މެޗު ކާމިޔާބުކުރީ 4-2 ން ސާއްބަ އެފްސީ ބަލިކޮށްގެންނެވެ. މެޗުގައި މުހައްމަދު މަމްދޫހު ދެ ލަނޑު ޖެހިއެވެ. އަނެއް ދެ ލަނޑު ޖެހީ އަލީ މުޙައްމަދާއި, އަހުމަދު ހަމީމް އެވެ. ސާއްބަ އެފްސީގެ ދެ ލަނޑު ޖެހީ އަލީ ޒުބައިރު އާއި މުޙައްމަދު އާއިދު އެވެ. މެޗުގެ މޮޅު ކުޅުންތެރިއަކީ ކުޑަކަންމަތި ސްޕޯރޓްގެ މަމްދޫހު އެވެ.
ފައިނަލްގެ ސީދާ ޖާގައެއް ހޯދަން ކުޑަކަންމަތި ސްޕޯރޓްސް ކްލަބް ވާދަކުރަން ޖެހޭނީ ކުޑަކަންމަތި ޔުނައިޓެޑާއެވެ. ސާއްބަ އެފްސީ ވަނީ މިހާތަނަށް ކުޅުނު ދެ މެޗުންވެސް ބަލިވެފައެވެ.
ވެލިދޫ ސްޕޯރޓްސް ކްލަބް ވަނީ ފޮއްދޫ ޞިއްހީ މަރުކަޒު ބަލިކޮށް އުއްމީދު ހޯދާފައެވެ. މެޗު ވެލިދޫން ކާމިޔާބުކުރީ 7-1 ނެވެ. މެޗުގައި އަލީ އާލިމް އާއި އަބްދުالله އިބްރާހީމް ދެ ލަނޑު ޖެހިއެވެ. ވެލިދޫ ޓީމަށް ދެން ލަނޑުތައް ޖަހައިދިނީ އަޔާލް އަބްދުالله އާއި އަބްދުالله ޒިހާމް އެވެ. އެއް ގޯލަކީ ސިއްހީ މަރުކަޒު ކުޅުންތެރިން އަތުން ބައިކޮޅަށް ވަން ލަނޑެކެވެ. ޞިއްހީ މަރުކަޒު ޓީމްގެ ހަމައެކަނި ލަނޑު ޖެހީ އަސަދު އަބްދުލް ވައްހާބެވެ. ސިއްހީ މަރުކަޒު ޓީމް ތިން މެޗުންވެސް ބަލިވެފައި ވާތީ ކުރިއަށްދާން ދެން ފުރުޞަތެއް ނެތެވެ. މެޗުގެ މޮޅު ކުޅުންތެރިއަކީ ވެލިދޫ ޓީމްގެ އަލީ އާލިމް އެވެ.
