ދޯންޏެއް ނުވަތަ ޑިންގީއެއްގައި ދަތުރުކުރާކަށް ނުޖެހޭނެއެވެ. ސައިކަލްގައި ނުވަތަ ފައިމަގުގައިވެސް އެރަށަށް ދެވޭނެއެވެ. އެއީ ނ.ވެލިދޫ ކައުންސިލުން އެރަށުގެ ރައްޔިތުން ޕިކްނިކް ދިއުމަށް ތައްޔާރުކޮށްފައިވާ ސަރަހައްދެވެ. ވެލިދޫ ޕިކްނިކް އައިލެންޑެވެ.
ރަށުގައި މީހުން ދިރިއުޅޭ ސަރަހައްދ ރަށުގެ ނިސްބަތުން ދުރުގައި އޮންނަ އެސަރަހައްދުގައި ވަނީ ބާބަކިޔު ހެދޭނެ އިންތިޒާމް ހަމަޖައްސާފައެވެ. ފެންވެރޭނެ ގޮތް އެބަހުއްޓެވެ. އުނދޯންޏާއި ޖޯލިފަތިތައް އެބަހުއްޓެވެ. ގަސްތައް ހުރުމުން މާހައުލު ހިތްގައިމެވެ. އާއިލާގައި ތިބި އުމުރުން ދުވަސްވީ މީހުންނަށް އުފާވެރި ވަގުތެއް ހޭދަކޮށްލެވޭނެއެވެ. ކުޑަކުދިންނަށް މޫދުގައި މަޖާކޮށްލުމުގެ ފުރުޞަތު އެބައޮތެވެ. ޕިކްނިކް ހަދާލަން މިމާހައުލް ހަމަ ފައްކަލެވެ. މަދުވަނީ ހަމައެކަނި ފާޚާނާއެކެވެ.
މިއީ ރަށުގެ ރައްޔިތުން ކަސްރަތަށްވެސް އަންނަ ސަރަހައްދެކެވެ. ހެނދުނާއި ހަވީރުވެސް މޫދުގައި އެކިއުމުރުގެ މީހުން ކަސްރަތަށް އައިސް އުޅެއެވެ. ރަށުގެ ނިސްބަތުން ޕިކްނިކް ދިއުމަށް ކަނޑައަޅާފައިވާ ސަރަހައްދުވެސް ކުޑައެއް ނޫނެވެ. ސާފްތާހިރުކޮށް މުޅި ސަރަހައްދު ބަލަހައްޓައެވެ. ޑަސްބިން ބަހައްޓާފައި ހުރުމުން ޒިޔާރަތްކުރާ ފަރާތްތަކުންވެސް އޭގެ ބޭނުން ކުރެއެވެ. މިތަނަށް ފަތުރުވެރިން ޒިޔާރަތްކުރުން މަނައެވެ. މިއީ ވެލިދޫ ރައްޔިތުންނާއި, ވެލިދުއަށް ޒިޔާރަތްކުރާ ދިވެހިންނަށް އޮތް ސަރަހައްދެކެވެ.
ގިނަ ރަށްތަކުގައި މިފަދަ ތަންތަން ވަނީ ތަރައްޤީކޮށްފައެވެ. ބައެއް ރަށްރަށުގައި ކައުންސިލް ތަކުންނެވެ. ބައެއް ރަށްރަށުގައި ކްލަބް ޖަމްއިއްޔާތަކުންނެވެ. އަދި ޒުވާނުން އިސްވެ ވެސް މިފަދަ ތަންތަން ތަރައްޤީކޮށްފައި އެބަހުއްޓެވެ. ވެލިދޫގައި މިއީ ކައުންސިލްގެ މަސައްކަތެކެވެ.
ލިޔުމާ ގުޅޭ ވީޑިއޯ މަތީގައި އެވަނިއެވެ.
