ހިއުންޑާއީ ގޯލްޑަން ފުޓްސަލް ޗެލެންޖްގެ އައްޑޫ ސިޓީގެ ޗެމްޕިއަންކަން ހިތަދޫން ހޯދައިފިއެވެ. މިއަހަރުގެ ފުރަތަމަ އަތޮޅު ތަށި ހިތަދޫން އުފުލާލީ ފައިނަލްގައި 5-2 ން މަރަދޫ ބަލިކޮށްގެންނެވެ.
ފައިނަލް މެޗުގައި އައްޑޫ ސިޓީގެ އަހުމަދު އަމްނު ތިން ލަނޑު ޖެހިއެވެ. އަނެއް ދެ ލަނޑު ޖެހީ ކެޕްޓަން ހާޒިމް ފައުޒީއެވެ. މެޗުގެ މޮޅު ކުޅުންތެރިއަކީވެސް ހާޒިމް އެވެ.
މަރަދޫގެ ދެ ލަނޑު ޖެހީ މުޙައްމަދު ޝަހާއު އަލީ އާއި ހަސަން އަތޫފް އެވެ. އައްޑޫ ސިޓީގެ އެންމެ މޮޅު ކުޅުންތެރިއަކީ ހިތަދޫ ކެޕްޓަން ހާޒިމް އެވެ. އަދި ޓޮޕް ސްކޯރަރ އަށް ދޭ ޓްރޮފީވެސް ހޯދީ އޭނާ އެވެ. މެޗަށްފަހު ހާޒިމް ބުނީ މިއީ ހިތަދޫ ރައްޔިތުންނަށް ހައްގު, އެރައްޔިތުންނަށް ދޭ ހަދިޔާއެއް ކަމަށެވެ.
ހިތަދޫން ތަށި އުފުލާލީ ކުރީގެ އެއްވަނަ މިޑްފީލްޑަރ ޝަމްވީލް ޤާސިމް (ބޮންޑާ)ގެ އިރުޝާދުގެ ދަށުންނެވެ. ފައިނަލް މެޗަށްފަހު ބޮންޑާ ބުނީ ނަތީޖާއިން މެޗު ފަސޭހަކަމަށް ހީވިޔަސް, މިއީ ފަސޭހަ މެޗެއް ނޫން ކަމަށާއި, މިއީ ކުޅުންތެރިން ކުރި ވަރަށް ބުރަ މަސައްކަތުގެ ނަތީޖާ ކަމަށެވެ.
ހިތަދޫ އާއި މަރަދޫވެސް ޒޯން ބުރުގައި ވާދަކުރާނެއެވެ.
