ތިލައުތުރު ފުޓްސަލް މުބާރާތުގައި ދިއްދޫ އާއި ބާރަށް ކުޅުނު ފުރަތަމަ މެޗު ކާމިޔާބުކޮށްފިއެވެ. އުތީމްގައި ކުރިއަށްދާ މުބާރާތުގައި މިދެޓީމްވެސް ހިމެނެނީ ގްރޫޕް ބީގައެވެ.
ގްރޫޕް ބީގެ ފުރަތަމަ މެޗު ދިއްދޫ ކާމިޔާބުކުރީ މުރައިދޫއާ ވާދަކޮށް, ފަހަތުން އަރާ ދެ ލަނޑު ޖަހައިގެންނެވެ. މެޗުގައި ފުރަތަމަ ލަނޑު ޖަހާ މުރައިދޫއަށް ކުރި ހޯދައިދިނީ މުޙައްމަދު ނާއިސް އެވެ. ދިއްދޫއަށް ނަތީޖާ ހަމަހަމަކޮށްދީ, މެޗުން މޮޅުކޮށްދިނީ މުޙައްމަދު ނައުޝާދު އެވެ. މެޗުގެ މޮޅު ކުޅުންތެރިއަކީވެސް ނައުޝާދު އެވެ.
މިގްރޫޕްގެ ދެވަނަ މެޗުގައި ކެލާގެ މައްޗަށް ބާރަށުން ކުރި ހޯދީ 1-0 ނެވެ. މެޗުގެ ހަމައެކަނި ލަނޑު ޖެހީ އަބްދުالله މިސްބާހުއެވެ. މެޗުގައި ބާރަށުން ފޮނުވާލި ގިނަ ބޯޅަތަކެއް ކެލާ ކީޕަރު އަބްދުالله ޒިމާމް މަތަކުރިއެވެ.
މުބާރާތުގައި ގްރޫޕް އޭގެ ފުރަތަމަ ދެ މެޗު ނިމުނީ އެއްވަރުވެގެންނެވެ. ފުރަތަމަ މެޗު އިހަވަންދޫ އާއި އުތީމް ވާދަކޮށް އެއްވަރުވީ 1-1 ނެވެ. މެޗުގައި ފުރަތަމަ ލަނޑު ޖަހާ އުތީމަށް ކުރިހޯދައިދިނީ ރިޝްވާން އިބްރާހީމް ރަޝީދު މޫސާއެވެ. އިހަވަންދޫއަށް ނަތީޖާ ހަމަހަމަކޮށްދިނީ އަލީ ނާއިޝް އެވެ. މެޗުގެ މޮޅު ކުޅުންތެރިއަކީ އުތީމްގެ މުޙައްމަދު މަޒީން އެވެ.
މިގްރޫޕްގެ ދެވަނަ މެޗުގައި ވަށަފަރާއި ފިއްލަދޫ ވާދަކޮށް އެއްވަރުވީ 2-2 ނެވެ. ދެފަހަރުވެސް ވަށަފަރު ކުރިހޯދި މެޗުގައި އެޓީމްގެ ދެ ލަނޑު ޖެހީ މެޗުގެ މޮޅު ކުޅުންތެރިޔާ އަބްދުالله ސިނާން އެވެ. ފިއްލަދޫގެ ދެ ލަނޑު ޖެހީ އާދަމް އަބްދުއްރަހީމް އާއި މުޙައްމަދު ހުޝާމް އެވެ.
މުބާރާތުގައި ހއ.އަތޮޅުގެ 9 ރަށަކުން ވާދަކުރެއެވެ. މުބާރާތުގައި މިއަދުވެސް 4 މެޗު ކުޅޭނެއެވެ.
