ތިލައުތުރު ފުޓްސަލް މުބާރާތް ފަށަން ކުޅުނު ޗެރިޓީ މެޗު އެންމެ ފަހުގެ ޗެމްޕިއަން އިހަވަންދޫން ކާމިޔާބުކޮށްފިއެވެ. އިހަވަންދޫން ޗެރިޓީ ޝީލްޑް ކާމިޔާބުކުރީ އުތީމާ ވާދަކޮށް ޕެނަލްޓީގައި ކުރި ހޯދައިގެންނެވެ.
އެންމެ ފަހުގެ ފައިނަލްގައިވެސް ކުޅުނު ދެޓީމް މިފަހަރު ޗެރިޓީ. މެޗުގައި ވާދަކުރީ ޗެމްޕިއަން ޓީމްގެ ހައިސިއްޔަތުންނާއި މުބާރާތް ބާއްވާ ރަށުގެ ހައިސިއްޔަތުންނެވެ. މިފަހަރުގެ މުބާރާތް ބާއްވަނީ އުތީމްގައެވެ.
ޗެރިޓީ މެޗު އިވަހަންދޫން ކާމިޔާބުކުރީ ފުރިހަމަ ވަގުތު ދެޓީމް 1-1 ން އެއްވަރުވެ, ނަތީޖާ ނެރުމަށް ޖެހި ޕެނަލްޓީގައި ކުރި ހޯދައިގެންނެވެ. މެޗުގެ ފުރިހަމަ ވަގުތުގެ ތެރެއިން ފުރަތަމަ ހާފްގައި އިހަވަންދޫއަށް ލީޑް ނަގައިދިނީ އަލީ ނާއިޝް އެވެ. ދެވަނަ ހާފްގައި އުތީމަށް ނަތީޖާ ހަމަހަމަ ކޮށްދިނީ ރިޝްވާންއެވެ.
ޕެނަލްޓީގައި އިހަވަންދޫން ވަނީ ފަސް ޕެނަލްޓީވެސް ކާމިޔާބުކޮށްފައެވެ. އުތީމުން ޖެހި ހަތަރު ޕެނަލްޓީގެ ތެރެއިން އެއް ޕެނަލްޓީ މެޗުގެ މޮޅު ކުޅުންތެރިއަކަށް ހޮވުނު އިހަވަންދޫ ކީޕަރު ނައްސާން ދިފާއުކުރިއެވެ.
މިފަހަރުގެ ތިލައުތުރު ފުޓްސަލް މުބާރާތުގައި އަތޮޅުގެ 9 ރަށަކުން ވާދަކުރެއެވެ. މުބާރާތް ކުރިއަށް ދަނީ ދެ ގްރޫޕަށް ބަހާލައިގެން, ކޮންމެ ގްރޫޕަކުން އެއްވަނަ އަދި ދެވަނަ ޓީމް ސެމީފައިނަލަށް ދަތުރުކުރާ ގޮތަށެވެ.
މުބާރާތް ފެށުމަށް އުތީމްގައި ވަނީ ކުލަގަދަ ރަސްމިއްޔާތެއް ބާއްވާފައެވެ. މުބާރާތް ފެށި ދުވަހާ ނަސްރުގެ ދުވަސް ދިވާވުމުން އުތީމް ޣާޒީ ބަންޑާރައިން ސްކޫލްގެ ދަރިވަރުން ވަނީ ނަސްރުގެ ދުވަސް ތަސައްވަރުކޮށްދޭ ކުރު ޑްރާމާއެއްވެސް ހުށަހަޅައިދީފައެވެ.
ތިލައުތުރު ފުޓްސަލް މުބާރާތުގެ ފައިނަލް މެޗު ކުޅޭނީ މިމަހުގެ 12 ވަނަ ދުވަހުއެވެ.
