ޅ.ނައިފަރު ޒުވާނުން ޓަރފް އެޅި ޒަމާނީ ވޮލީބޯޅަ ކޯޓެއްގައި މުބާރާތްތައް ކުޅެން ދެކެމުން އައި އުއްމީދަށް ކައުންސިލުން ނިމުން ގެނެސްދީފިއެވެ. ނައިފަރު ޒުވާނުންގެ އުއްމީދު ތަކަށް ރަށު ކައުންސިލުން ނިމުން ގެނެސްދިނީ ޓަރފްއެޅި އައުޓްޑޯ ދެ ވޮލީ ކޯޓް އެކުގައި ނިންމާ ހުޅުވުމާއެކު އެކޯޓްގައި ފުރަތަމަ މުބާރާތްވެސް ފަށައިގެންނެވެ.
ނައިބޮލި ވޮލީބޯޅަ ކޯޓް ހުޅުއްވައިދެއްވީ ކުޅިވަރާބެހޭ ވަޒީރު ޢަބްދުالله ރާފިއު އާއި މަސްވެރިކަމާބެހޭ ވަޒީރު އަހުމަދު ޝިޔާމް އެވެ. މިއީ ނައިފަރު ކައުންސިލުން އިސްނަގާ މަސައްކަތް ފެށި ވޮލީ ދެ ކޯޓެވެ. ނަމަވެސް މަސައްކަތް ނިންމީ ސަރުކާރުގެ އެހީތެރިކަންވެސް ލިބިގެންނެވެ. ކުޅިވަރާބެހޭ ވުޒާރާގެ އެހީތެރިކަން ލިބުނުކަން ނައިފަރު ކައުންސިލްގެ ރައީސް މުޙައްމަދު ރަޝީދު ފާހަގަކުރެއްވިއެވެ.
ނައިބޮލި ވޮލީބޯޅަ ކޯޓަކީ 14 އަހަރުގެ އުއްމީދެއްގައި ކުލަޖެހުންކަމަށް ނައިފަރު ކައުންސިލުން ވިދާޅުވިއެވެ. ކައުންސިލް ރައީސް މުޙައްމަދު ރަޝީދު ވިދާޅުވީ ކައުންސިލާ ކުޅިވަރާބެހޭ ވުޒާރާ ގުޅިގެން މިކުރި މަސައްކަތަކީ ކުޅިވަރުގެ ރޫހާ އެއްގޮތަށް ކުޅިވަރުކުޅޭ ނައިފަރުގެ ރައްޔިތުންނަށް ލިބުނު ވަރަށް އަގުހުރި ފުރުޞަތެއް ކަމަށެވެ.
ސާދަ އަހަރު ފަހުން ޒަމާނީ ފެންވަރަކަށް މިވޮލީކޯޓް ހުޅުވުމުގެ ފުރުޞަތު ސަރުކާރުގެ ތެރެއިން ފަހިވެގެންގޮސް މިއަދު މިވަނީ ކޯޓްގެ ބޭނުން ކުރެވޭވަރަށް އަޅުގަނޑުމެންނަށް ކޯޓް ލިބިފަ.
ކުޅިވަރާބެހޭ ވަޒީރު އަބްދުالله ރާފިއު ވިދާޅުވީ އެންމެން ގުޅިގެން ނައިފަރުގައި ހުޅުވުނު ވޮލީކޯޓާއެކު ފެނިގެންދާނީ މުބާރާތްތައް އިތުރުވާތަން ކަމަށެވެ. އަދި ފޯރި ގަދަވެ, މުޅިރަށުގެ ރައްޔިތުން މިކަމުގެ އުފާފާޅުކުރާތަން ފެނިގެންދާނެ ކަމަށް ވިދާޅުވިއެވެ.
ވޮލީކޯޓް ހުޅުވުމާއެކު އާ ކޯޓްގައި ފުރަތަމަ މުބާރާތްވެސް ވަނީ ފަށާފައެވެ. އެއީ 2023 ވަނަ އަހަރު ފެށި ނައިބޮލި ވޮލީބޯޅަ މުބާރާތެވެ. މިއަހަރުގެ މުބާރާތުގައި ޖުމްލަ 11 ޓީމް ވާދަކުރެއެވެ. އެއީ އަންހެން ޑިވިޝަންގައި 6 ޓީމް އަދި ފިރިހެން ޑިވިޝަންގައި 5 ޓީމެވެ. އަންހެން ޑިވިޝަންގައި ހިންނަވަރާއި ކުރެންދޫ ޓީމެއް ވާދަކުރެއެވެ. އަދި ފިރިހެން ޑިވިޝަންގައި ހިންނަވަރު ޓީމެއް ވާދަކުރެއެވެ.
މުބާރާތުގެ ފުރަތަމަ މެޗު ކާމިޔާބުކުރީ ނައިފަރު ޗެލްސީ އެވެ. ފިރިހެން ޑިވިޝަންގެ އެންމެ ފަހުގެ ޗެމްޕިއަން ޓީމުން މެޗު ކާމިޔާބުކުރީ އެޕެކްސް ސްޕޯރޓްސް ކްލަބާ ވާދަކޮށް ސީދާ ތިން ސެޓުންނެވެ. މެޗުގެ ސެޓްތައް ގެންދިޔައީ 25-11, 25-12 އަދި 25-17 ނެވެ. މެޗުގެ މޮޅު ކުޅުންތެރިއަކީ ނައިފަރު ޗެލްސީގެ އަހުމަދި އަޒީމް އެވެ.
އަތޮޅަށް ހުޅުވާލި މުބާރާތް މިމަހުގެ 28 ވަނަ ދުވަހުގެ ނިޔަލަށް ކުރިއަށްދާނެއެވެ. މުބާރާތުގައި 11 ޓީމުން 29 މެޗު ކުޅޭނެއެވެ.
