ވ.އަތޮޅު ވޮލީބޯޅަ މުބާރާތުގެ ފިރިހެން ޑިވިޝަންގެ ފައިނަލްގެ ދެވަނަ ޖާގަ ކެޔޮދޫ އިން ހޯދައިފިއެވެ.
ކެޔޮދޫ ފައިނަލް ޔަގީންކުރީ ލީގު ބުރުގައި އެޓީމްގެ ތިންވަނަ މެޗުގައި ސީދާ ތިން ސެޓުން ތިނަދު ބަލިކޮށްގެންނެވެ. މެޗުގެ ސެޓްތައް ކެޔޮދޫން ގެންދިޔައީ 25-19, 25-22 އަދި 25-16 ނެވެ. މެޗުގެ މޮޅު ކުޅުންތެރިއަކީ ކެޔޮދޫގެ އަހުމަދު އަބްދުލްކަރީމް (ލޯންގޭ) އެވެ.
މެޗަށްފަހު ލޯންގޭ ބުނީ މެޗަށް ނިކުތީ މޮޅުވާން ކަމަށާއި, ފައިނަލްގެ ޖާގައާއެކު އުއްމީދަކީ ތަށި ހޯދުންކަމަށެވެ. ފެލިދޫއާ ދެކޮޅަށް ކުޅޭ މެޗަކީ ދެޓީމަށްވެސް އުނދަގޫވާނެ މެޗެއް ނަމަވެސް ސަޕޯޓަރުންގެ އެހީގައި ތަށި ހޯދުމުގެ އުއްމީދު އެބައޮތް ކަމަށް ރާއްޖޭގައި އުފެދުނު އެންމެ މޮޅު އެއް ކުޅުންތެރިޔާ ލޯންގޭ ބުންޏެވެ.
މެޗު ތިނަދޫން ކުޅުނީ ސަސްޕެންޝަންގައި ހުރި އިޝާން އިބްރާހީމް (ބަޓިޝް) ނުލައެވެ. އަދި ބިދޭސީ ދެ ކުޅުންތެރިންގެ ތެރެއިން އަހުމަދު މުސްތަފާ ޚާން އަށް އަނިޔާވުމުން ތިންވަނަ ސެޓްގައި އޭނާ ބަދަލުކުރަން ޖެހުނެވެ.
ފައިނަލްގައި ވާދަކުރާނީ ކެޔޮދޫ އާއި ފެލިދޫ އެވެ. ފެލިދޫ ވަނީ ކުޅުނު ދެ މެޗު ވެސް ކާމިޔާބުކޮށްފައެވެ. ތިންވަނަ މެޗުގައި ބުރާސްފަތި ދުވަހުގެރޭ ފުލިދޫއާ ދެކޮޅަށް ނިކުންނަނީ ފައިނަލް ޔަގީންކޮށްގެންނެވެ. ކެޔޮދޫ ވަނީ ތިން މެޗުގެ ތެރެއިން ދެ މެޗުން މޮޅުވެފައެވެ. ބަލިވީ ފެލިދޫއާ ވާދަކުރި މެޗުގައި 3-2 ސެޓުންނެވެ. ތިނަދޫ ތިން މެޗުގެ ތެރެއިން މޮޅުވީ ފުލިދޫ އަތުންނެވެ.
ފިރިހެން ޑިވިޝަންގެ ފައިނަލް މެޗު ކުޅޭނީ އަންނަ ހޮނިހިރު ދުވަހުގެ ރެއެވެ.
