ފޮއްދޫ ކައުންސިލްގެ ހަ ވަނަ ފުޓްސަލް މުބާރާތުގައި މަގޫދޫ އިން އެންމެ ފަހުގެ ޗެމްޕިއަން ކުޑަކަންމަތި ސްޕޯރޓްސް ކްލަބް އަތުން މޮޅުވެ, ހޮޅުދޫ އާއި ޅޮހި އެއްވަރުވުމުން ފޮއްދޫގެ ޓީމްތަކަށް ޕްރެޝަރު ބޮޑުވެއްޖެއެވެ.
ފޮއްދޫގެ ތިން ޓީމާއެކު ހަ ޓީމް ވާދަކުރާ މުބާރާތުގެ އެންމެ ކުރީގައި މިހާރު އޮތީ ފޮއްދޫ އަށް ނިސްބަތްނުވާ ތިން ޓީމެވެ. ކޮންމެ ޓީމެއް ދެ މެޗު ކުޅުނުއިރު އެއްވަނައިގައި އޮތީ އާބާދީ އެންމެ މަދު ރަށް މަގޫދޫ އެވެ. މަގޫދޫ އެފްސީ ގޯލަޑަން ފެލްކޮން އެއްވަނައިގައި އޮތީ ކުޅުނު ދެމެޗުވެސް ކާމިޔާބުކޮށްގެންނެވެ. ދެވަނަ މެޗުގައި 7-5 ން ބަލިކުރީ އެންމެ ފަހުގެ ޗެމްޕިއަން ކުޑަކަންމަތި ސްޕޯރޓްސް ކްލަބެވެ. މެޗުގައި މަގޫދޫގެ 7 ލަނޑުގެ ތެރެއިން 5 ލަނޑު ޖެހީ މެޗުގެ މޮޅު ކުޅުންތެރިޔާ ސައުދު މުޙައްމަދެވެ. ފުރަތަމަ ދެ ލަނޑު ޖެހީ މުޙައްމަދު އިރުޝާދު އެވެ. ކުޑަކަންމަތީގެ ފަސް ލަނޑުގެ ތެރެއިން އަހުމަދު މާއިޝް ރަޝީދު އާއި އަހުމަދު ހަމީމް ކުރެ, ކޮންމެ ކުޅުންތެރިއަކު ދެ ލަނޑު ޖެހިއެވެ. އަނެއް ލަނޑު ޖެހީ މުޙައްމަދު މަމްދޫހު އެވެ.
ދެވަނައިގައި އޮތީ ހޮޅުދޫ މައި ޔުޓައިލް ސްޕޯރޓްސް އެކަޑަމީ އެވެ. އަދި ގޯލްގެ ތަފާތުން ތިންވަނައިގައި އޮތީ ޅޮހީ ބޯއީޒް އެވެ. އެދެޓީމްވެސް އޮތީ 4 ޕޮއިންޓާއެކުއެވެ. އެދެޓީމް އެއް ޓީމް އަނެއް ޓީމާ ވާދަކުރި މެޗު ނިމުނީ 3-3 ން އެއްވަރު ވެގެންނެވެ. ޅޮހީގެ ތިން ލަނޑުގެ ތެރެއިން ދެ ލަނޑު ޖެހީ އަލީ އަކްޝަމް އެވެ. އަނެއް ލަނޑު ޖެހީ ހަސަން ޖަލީލް އެވެ. ހޮޅުދޫގެ ތިން ލަނޑުގެ ތެރެއިން ދެ ލަނޑު ޖެހީ މެޗުގެ މޮޅު ކުޅުންތެރިޔާ މުޙައްމަދު އާއިދު އެވެ. އަނެއް ލަނޑު ޖެހީ އަބްދުލް ވަދޫދު އެވެ.
ތާވަލްގެ ހަތަރު ވަނައިގައި އޮތީ ޔުނައިޓެޑް ކުޑަ މަންމައްޗެވެ. އެޓީމް ހަތަރު ވަނައިގައި އޮތީ ދެވަނަ މެޗުގައި ޓީމް ހެލްތް ބަލިކޮށްގެންނެވެ. މެޗު ޔުނައިޓެޑް ކޭކޭ އިން ކާމިޔާބުކުރީ 4-2 ނެވެ. ހަތަރު ލަނޑުގެ ތެރެއިން ތިން ލަނޑު ޖެހީ މޫސާ މާހިލް މިގުދާދު އެވެ. މެޗުގެ މޮޅު ކުޅުންތެރިއަކީ ވެސް އޭނާ އެވެ. އަނެއް ލަނޑު ޖެހީ ހުސައިން މިބުޝާމް އެވެ. ޓީމް ހެލްތްގެ ހަމައެކަނި ލަނޑު ޕެނަލްޓީ އަކުން ޖެހީ ރައުފަތު އަބޫ ބަކުރެވެ.
ދެ މެޗުން ޕޮއިންޓެއް ނުލިބި އޮތީ ކުޑަކަންމަތި ސްޕޯރޓްސް ކްލަބާއި ޓީމް ހެލްތެވެ.
