މިއީ ދެރަށެކެވެ. އެކަމަކު ވަރަށްގިނަ މީހުންނަށް އޮޅޭ, އޮޅުވާލާ ދެރަށެވެ. ސަރުކާރުގެ ބައެއް މިނިސްޓްރީތަކުންވެސް އޮޅުވާލާ ދެރަށެވެ. ދެރަށުގެ ދެމެދުގައި އޮތީ ލޯންޗްގައި 10 މިނިޓްގެ ރާސްތާއެކެވެ.
ދެރަށަކީވެސް ބޮޑު ދެރަށެވެ. މިހާރު މިހުރީ ނޮޅިވަރަންފަރުގައެވެ. މިރަށަށް މިއައީ ނޮޅިވަރަމުންނެވެ. އާރުޓީއެލް ފެރީގައި 10 މިނިޓްގެ ދަތުރެއްގައި ކޮޅަކަށް 35 ރުފިޔާއެވެ. އެކަމަކު މާލެއިން އަންނަ މީހަކަށް ބޮޑު ހޭދައެއް ހިނގާނެއެވެ. އެއީ މާލެއިން ކުޅުދުއްފުށްޓަށް އަދި މާލެއިން ހަނިމާދުއަށް ވެސް މޯލްޑިވިއަންގެ އެއްކޮޅު ޓިކެޓަކަށް 1464 ރުފިޔާ ނަގާތީއެވެ. އެދެރަށުންވެސް އާރުޓީއެލް ފެރީގައި ނޮޅިވަރަންފަރަށް އާދެވޭނެއެވެ. ހަނިމާދޫއަށްވުރެ ކައިރީ ކުޅުދުށްފުއްޓެވެ. ލޯންޗެއް ކުއްޔަށް ނަގައިގެން ކުޅުދުށްފުށިން އާދެވޭނީ 700 ރުފިޔާ އަށެވެ. މިއީ މިރަރަށް އަންނަން ހުރި މަގުތަކެވެ.
މިރަށަށް އާދެވުމުން މިރަށުގެ މީހުންވެސް އެދުނީ ނޮޅިވަރަމާއި ނޮޅިވަރަންފަރު އޮޅުވައިނުލާށެވެ. އަދި އެކަން ސަމާލުކަމަށް ގެނެސްދޭށެވެ. އެކަން ސަމާލުކަމަށް ގެންނަން ޖެހޭ އެތައް ސަބަބެކެވެ. ތަފާތު އެތައް ކޮފީ މޭޒަކުން އެފަދަ ބައެއް ސަބަބުތައް މިރަށު މީހުން ހިއްސާކޮށްދިނެވެ.
ނޮޅިވަރަންފަރު ސްޕޯރޓްސް ކައުންސިލަރުގެ މުސާރަ ނޮޅިވަރަމަށްވެސް ފޮނުވަނީއެވެ. ނޮޅިވަރަންފަރުގައި އަޅާ ޕާރކްގެ ސާމާނު ނޮޅިވަރަމަށްވެސް ދަނީއެވެ. ނޮޅިވަރަމްގައި ހިނގާ ހާދިސާއެއް ނޮޅިވަރަންފަރުގައި ހިނގިކަމަށް ނޫސްތަކުން ރިޕޯރޓްކޮށްފާނެއެވެ. ކޮށްފައިވެސް އެބަހުއްޓެވެ. ނޮޅިވަރަމަށް ފޮނުވާ ސިޓީއެއް ނޮޅިވަރަންފަރު ކައުންސިލްގެ ރައީސްގެ ނަން ޖަހާ އެޑްރެސްކުރަނީއެވެ. އަދި އެއްދުވަހު މިރަށުގައި މަޑުކޮށްލައިފިނަމަ މިފަދަ އެތައް ކަމެއް ހިއްސާކުރީހެވެ.
މިފަހަރު ދެން މިރަށުން ފައިބަނީއެވެ. ދެރަށް އޮޅުވައިނުލާން އަހަރެން ވަރަށްބޮޑަށް ސަމާލުވާނަމެވެ. އެކަމަކު އެވަރަކުން ނުފުދެއެވެ. ސަރުކާރާއި ނޫސްވެރިންވެސް ސަމާލުވާން ޖެހެއެވެ. ޢާއްމު ރައްޔިތުން އަންނާނީ އޭގެ ފަހަށްތާއެވެ.
