ބ.އަތޮޅު ފުޓްސަލް މުބާރާތް (ބެޓަރ އިން ބާ ފުޓްސަލް ފިއެސްޓާ 2024) ގެ ފިރިހެން ޑިވިޝަންގެ ފައިނަލްގައި އޭދަފުށްޓާއި ކިހާދޫ އަދި އަންހެން ޑިވިޝަންގެ ފައިނަލްގައި ގޮއިދޫ އާއި ދޮންފަން ވާދަކުރަން ޖެހިއްޖެއެވެ.
ފިރިހެން ޑިވިޝަންގެ އެންމެ ފަހުގެ ޗެމްޕިއަން އޭދަފުށި ފައިނަލަށް ދަތުރުކުރީ ސެމީފައިނަލްގައި 7-3 ން ގޮއިދޫ ބަލިކޮށްގެންނެވެ. މެޗުގެ ދެހާފްގައިވެސް ފުރަތަމަ ލަނޑު ޖެހީ ގޮއިދޫންނެވެ. ގޮއިދޫގެ ލަނޑުތައް ޖެހީ ހުސެއިން ޝާމް އާއި ކެޕްޓަން ހުސެއިން ޝިފާހު އެވެ. ޝިފާހު ދެ ލަނޑު ޖެހިއެވެ. އޭދަފުށިން ޖެހި 7 ލަނޑުގެ ތެރެއިން މުޙައްމަދު ފާސިރު އާއި އިޝާން އިބްރާހީމް ކޮންމެ ކުޅުންތެރިއަކު ދެ ލަނޑު ޖެހިއެވެ. އަނެއް ތިން ލަނޑު ޖެހީ ޝާހީ މޫސާ އާއި އަލީ ނަސީމް އާއި އުނެއިސް ޒުބެއިރު އެވެ. މެޗުގެ މޮޅު ކުޅުންތެރިއަކީ ފާސިރު އެވެ.
ފައިނަލްގައި އޭދަފުށި ވާދަކުރަން ޖެހޭނީ ކިހާދޫ އާއެވެ. ކިހާދޫ ފައިނަލަށް ދަތުރުކުރީ ޕެނަލްޓީގައި ދަރަވަންދޫ ބަލިކޮށްގެންނެވެ. މެޗުގައި ފުރަތަމަ ލަނޑު ޖަހާ ކުރި ހޯދީ ފުރަތަމަ ހާފްގައި ދަރަވަންދޫން ނެވެ. ލީޑް ނަގައިދިނީ އީމާން މުޙައްމަދު ވަހީދު އެވެ. ދެވަނަ ހާފްގައި ކިހާދޫ އަށް ނަތީޖާ ހަމަހަމަ ކޮށްދިނީ ހުސައިން ހަނާން އެވެ. ޕެނަލްޓީގައި ކިހާދޫން ވަނީ ފަސް ޕެނަލްޓީ ވެސް ކާމިޔާބުކޮށްފައެވެ. ކިހާދޫގެ ޕެނަލްޓީތައް ޖެހީ ހަނާން އާއި އަހުމަދު އަހުސަން އާއި އަލީ ފަރުހާން އާއި އަނަސް މުޙައްމަދު ގާސިމް އާއި ހުސެއިން އަރުޝަދު އެވެ.
ދަރަވަންދޫން ޖެހި ހަތަރު ޕެނަލްޓީގެ ތެރެއިން ނާކާމިޔާބުވީ މުޅި މުބާރާތުގައިވެސް މޮޅަށް ކުޅުނު މުޙައްމަދު ސިމާންގެ ޕެނަލްޓީ އެވެ. ދަރަވަންދޫން ޕެނަލްޓީ ކާމިޔާބުކުރީ ހުސައިން ނާސިފް އާއި ޝުޖާއު ހުސެއިން އާއި އީމާން އިލްޔާސް އެވެ. މެޗުގެ މޮޅު ކުޅުންތެރިއަކީ ކިހާދޫގެ ކީޕަރު އަހުމަދު ފަވާޒު އެވެ.
އަންހެން ޑިވިޝަންގެ ފައިނަލުން އެންމެ ފަހުގެ ޗެމްޕިއަން ގޮއިދޫ ޖާގަ ހޯދީ ސެމީފައިނަލްގައި 10-0 ން ކިހާދޫ ބަލިކޮށްގެންނެވެ. މެޗުގެ މޮޅު ކުޅުންތެރިޔާ މައީޝާ އަބްދުލް ހަންނާނު 5 ލަނޑު ޖެހިއެވެ.އަދި ފިރުޝާނާ ނަސީރު ތިން ލަނޑު ޖެހިއެވެ. އަނެއް ދެ ލަނޑު ޖެހީ ޝަފްނާ އިބްރާހީމް އާއި މަރިޔަމް ނަޒާހަތު އެވެ.
ފައިނަލްގައި ގޮއިދޫ ވާދަކުރާނީ ދޮންފަނާއެވެ. ދޮންފަން ފައިނަލަށް ދަތުރުކުރީ ސެމީފައިނަލްގައި 2-0 ން ދަރަވަންދޫ ބަލިކޮށްގެންނެވެ. ދޮންފަންގެ ދެ ލަނޑު ޖެހީ އައިމިނަތު ފަޒްލާ އާއި ހައިފާ ފިރާގެވެ. މެޗުގެ މޮޅު ކުޅުންތެރިއަކީ ހައިފާއެވެ. ފައިނަލް ދެ މެޗުވެސް ކުޅޭނީ އަންގާރަ ދުވަހުގެ ރެއެވެ.
