މިރަށުގައި ފަތުރުވެރިކަމަށް ޚާއްޞަ 75 އެނދު އެބަހުއްޓެވެ. އޭގެތެރެއިން 66 އެނދަކީ ގެސްޓްހައުސްގައި ހުރި އެނދެވެ. ރަޖިސްޓްރީކޮށްގެން ހިންގަނީ 3 ގެސްޓް ހައުސްއެވެ. އޭގެތެރޭގައި އެންމެ މަތީ ފަންތީގެ ގެސްޓް ހައުސް ހިމެނެއެވެ. އިތުރު ގެސްޓް ހައުސްތައް އިމާރާތް ކުރުމުގެ އެކި މަރުހަލާގައި އެބަހުއްޓެވެ.
ފަތުރުވެރިންނަށް ޚާއްޞަ ސަރަހައްދުތައް ރަށުގައި އެބަހުއްޓެވެ. ފަތުރުވެރިން ޝައުގުވެރިވާނެ ރީރި ބީޗާއި, މޫދެވެ. ގުދުރަތީ ގޮތުން ހިތްގައިމު ސަރަހައްދުތަކެވެ. ފަތުރުވެރިކަމުގައި އަދިވެސް ފޮއްދުއަށް އޮތީ ކުރިއެރުމެވެ. ރަށު ކައުންސިލުން ވަނީ 16000 އަކަފޫޓްގެ ބިމަކާއި, 10000 އަކަފޫޓްގެ ބިމެއްވެސް ފަތުރުވެރިކަމަށް ޚާއްޞަކޮށް ބިޑަށް ލާފައެވެ.
އަޅުގަނޑުމެން މިބަލަނީ ކުރިއަށް އޮތް މުސްތަޤްބަލްގައި އިރާދަކުރެއްވިއްޔާ މިރަށް ފައްކާވަމުންގޮސް މިހާރު މިހުރި ކުދިކުދި ކަންކަންވެސް ހައްލުވެގެންދާނެ ކަމަށް. ވަރަށްބޮޑު އާމްދަނީއެއްތާ ރަށަށްލިބޭ.
އަހުމަދު އިމްރާހު/ ފޮއްދޫ ކައުންސިލްގެ ނައިބު ރައީސް
ރަށުގެ ފަތުރުވެރިކަމަށް އޮތް އެންމެ ބޮޑު ގޮންޖެހުމަކީ ދަތުރުފަތުރެވެ. އެއަޕޯޓާ ދުރުވުމުން ފަތުރުވެރިން ރަށަށް އައުމަށް ބޮޑު ހޭދައެއް ކުރަން ޖެހުމެވެ. އަދި ޚަރަދުވެސް ބޮޑުވުމެވެ. މިއީ ކުޑަ ރަށެކެވެ. އާބާދީވެސް މަދެވެ. 24 ހެކްޓަރުގެ މިރަށުގެ މީހުން ދިރިއުޅޭ ސަރަހައްދުގައި އޮންނަނީ މައިގަނޑު ތިން މަގެވެ. ރަށުގެ އާބާދީ އަކީ 490 އެއްހާ މީހުންނެވެ. 500 ހަމައެއް ނުވެއެވެ. އޭގެތެރެއިން ސްކޫލްގައި ކިޔަވާދަރިވަރުންގެ އަދަދަކީ 62 އެވެ. ގްރޭޑް 10 އަށް ކިޔަވައިދެއެވެ. ގްރޭޑް 10 ގައި ކިޔަވަނީ އެންމެ 6 ދަރިވަރުންނެވެ.
އާބާދީ މަދަސް ތަރައްޤީގައި މިރަށުގައިވެސް ވަނީ މުހިއްމު މަސައްކަތްތަކެއް ކޮށްފައެވެ. ފެނާއި ނަރުމަދާގެ ޚިދުމަތް ދެއެވެ. ފެނަކަ އިންޖީނުގެއާއި އޮފީސް އާ އިމާރާތެއް ގާއިމްކޮށް, ޚިދުމަތް ވަނީ ބަދަލުކޮށްފައެވެ. ގިރާ ސަރަހައްދު ހިމާޔަތްކުރުމަށް ތޮށްޓެއް ވަނީ ލާފައެވެ. ސްކޫލަށް އިތުރު ކުރެވޭ ހަތަރު ކްލާސްރޫމް ހިމެނޭ އިމާރާތުގެ މަސައްކަތް ފެށިޔަސް އެމަސައްކަތް ނިންމައެއް ނުލެވެއެވެ. ކުނި މެނޭޖް ކުރުމުގެ ނިޒާމެއް ވަނީ ގާއިމްކޮށްފައެވެ. އެކަމަކު ރަނގަޅު ވަޞީލަތް ނެތުމުން ކުނި ނައްތާލުމުގައި އަދި ފުރިހަމަ ހައްލެއް ނުހޯދެއެވެ.
މިވަގުތު ރަށަށް އޮތް އެންމެ ބޮޑު ގޮންޖެހުމަކީ ފަޅުގެ ދަތިކަމެވެ. ކައުންސިލްގެ ނައިބުރައީސް އަހުމަދު އިމްރާހު ވިދާޅުވީ ކުޑަ އާބާދީއަކަށް ބަލާއިރު ހައްލުނުވެ އޮތް ހަމައެކަނި ކަމަކީވެސް ފަޅެއްގެ ކަންތައް ކަމަށެވެ. ރަށުގައި އަރާ ފައިބަން ބޭނުންކުރަނީ ޖެޓީއެކެވެ. ނަމަވެސް އެއީ ހުރިހާ މޫސުމަށް ބޭނުންކުރެވޭ ޖެޓީއެއް ނޫނެވެ. އެކަމަށް ހައްލު ގެނައުމަށް އެމްޓީސީސީއާ ވަނި ހަވާލުކޮށްފައެވެ.
މިރަށުގެ ގިނަ މީހުން މަސައްކަތް ކުރަނީ ފަތުރުވެރިކަމުގެ ދާއިރާގައެވެ. އީދާއި ބޮޑަތި ބަންދަށް މިރަށަށް ބާރުބޮޑެވެ. ޚައްޞަކޮށް އީދުގައި ސަގާފީ ކުޅިވަރުތަކާއި އެހެން ގިނަ ކުޅިވަރުތައް އޮންނަކަމަށް ކައުންސިލުން މައުލޫމާތު ދެއްވިއެވެ. މިއީ ނ.ފޮއްދޫ އެވެ.
