“މޯލްޑިވްސް ޔޮޓް ރެލީ 2023 ” ގެ ދެވަނަ އެޑިޝަން ފެށީ ނ.ލަންދޫންނެވެ. ޔޮޓް ރެލީގެ ދަތުރުތައް ފެށުމުގެ ރައްމިއްޔާތު ބުދަ ދުވަހު ނ.ލަންދޫގައި ވަނީ ބާއްވާފައެވެ. ރެލީގައި ބައިވެރިވާ 14 ޔޮޓް އޮތީ ލަންދޫ ބަނދަރުގައެވެ. ލަންދޫން ޔޮޓްރެލީ ފަށަން އެމްއައިޓީޑީސީން ނިންމީ 2022 ވަނަ އަހަރު ބޭއްވި ފުރަތަމަ އެޑިޝަންގައި ލަންދޫން ވަރަށް ފުރިހަމައަށް ތައްޔާރުވެ, ފަތުރުވެރިން ހައިރާންކޮށްލާފައިވާތީއެވެ. ފުރަތަމަ އެޑިޝަންގައި ފަތުރުވެރިންގެ އެންމެ މަޤްބޫލް މަންޒިލަކަށްވީވެސް ލަންދޫއެވެ.
ދެވަނަ އެޑިޝަން ފެށުމަށްވެސް ނ.ލަންދޫން ވަނީ ފުރިހަމަ މަރުހަބާއެއް ކިޔާފައެވެ. ދިވެހި މަސައްކަތްތެރިކަމާއި, ދިވެހިންގެ އާދަކާދަ ދައްކުވައިދިނެވެ. ދިވެހިންގެ ރަހަތަކާއި, ލަންދޫގެ ޚާއްޞަ ރަހަތަކާއެކު މުއްސަނދި ސުފުރާއެކެވެ. މަރުހަބާކިއުން އޮތީ ޘަޤާފީ ކުޅިވަރުތަކުންނެވެ. ބޮޑުބެރުގެ ހަރަހާތްތަކެވެ. ލަންދޫން ފެނުނީ ހަމަ މުޅިން ތަފާތު މެހުމާންދާރީއެކެވެ. މިފަހަރުވެސް ލަންދޫން ފަތުރުވެރިން ހެއްވާލައިފިއެވެ.
